أجرى الحوار/ رقية محمد
يارا احمد صحفيه ومراسله بدأت مشورها المهني في مجال الإعلام منذ طفولتها ، يارا هي نموذج لابد ان يقتضي به كل شاب وشابه في بداية عمرهم ، نموذج للأصرار والعزيمه والسعي ، تحدت جميع الصعوبات التي كانت تواجهها رغم صغر سنها للوصول الي حلمها ، ظلت تسعي الي حلمها للتتقدم خطوه وراء الاخري دون استسلام ، وفي هذا الحوار سوف نتعرف علي تفاصيل اكثر في حياة يارا احمد وماهي الصعوبات التي واجهتها وما هي احلامها وطموحاتها للفتره القادمه .
في البداية بنرحب بيكي معانا يا يارا ، عرفينا بنفسك اكتر ؟انا يارا احمد ، خريجة إعلام تربوي جامعة القاهرة ، ٢٤ سنه ، صحفيه في موقع الفجر و مراسله في قناة cbc في برنامج it's show time ، و انا كمان عندي شركه و PR managr وبشتغل مع اكتر من فنان وبنظم احداث فنيه والاحتفالات الخاصه بالفنانين.
ما هو سبب حبك لمجال الصحافة والإعلام ؟
* سبب حبي للصحافه هو انه وانا صغيره كنت بشتغل في الصحافه المدرسيه من وانا في أبتدائي لحد ما بقا عندي ١٤ سنه .
كيف بدأتي مشوارك في مجال الإعلام ؟
لما بقا عندي ١٤ سنه عملت مجله خدت مركز اول علي مستوي الجمهوريه وبدأت اتدرب في اخبار اليوم المسائيه عن طريق الصحفي الراحل ياسر ياسين وبدأت انشر لقاءات لحد ما وصل بيا الموضوع لأني اشتغلت في موقع الفجر وده حصل من ٩ سنين ولحد دلوقتي شغاله في قسم الفن وانا بحب موقع الفجر جداً وكانت بالنسبالي نقطة الانطلاق ومن ٢٠١٧ بدأت شغلي كمراسله في القنوات.
ما هي الصعوبات التي وجهتك اثناء مشوارك المهني ؟ وجهت صعوبات كتير اهمها ان انا كنت داخله المجال بمجهودي بدون اي وسطه ، وكمان صعوبات في التعامل مع مصادر الفن لانها اكتر مصادر متعبه في الوصول ليها وخد مني وقت ومجهود كبير لحد ما عرفوني ، وكمان كانت بتواجهني صعوبات في ان انا عايزه اعمل حاجه مميزه لأن في صحفيين ومراسلين كتير فا كنت بحاول اعمل انفرادات وشغل مميز عن الباقي علشان الناس تحبني وتعرفني.
من هم الاشخاص الذين كانوا يشجعوكي دائماً ؟
في البدايه كان ديماً بيشجعني الدكتور مصطفي ثابت رئيس تحرير موقع الفجر ، حالياً اهلي وجوزي هما اكتر ناس بيشجعوني علي الشغل بجانب الاستاذ احمد رمضان رئيس قسم الفن في الموقع
ما هو اكثر موقف اثر فيكي اثناء العمل وكان دافع ليكي للأستمرار ف طريقك وتقدمك ؟
مواقف كتير اثرت فيا زي ان مصدر يشكر فيا وفي شغلي ولما الفنان ياسر جلال جه حضر تكريم في الموقع مخصوص علشاني وقالي ان انا هبقى صحفيه شاطره جداً وليا مستقبل كبير ، وحب الناس عمومًا بيأثر فيا وبيشجعني وخصوصاً الناس اللي علي السوشيال ميديا اللي متعرفنيش بس بتشوف شغلي وبتحبني ، وكمان استاذ هاني شاكر من الناس اللي بتشجعني وتدعمني وقالي ان انا شاطره جداً ، والمخرج تامر حمزه ده من اقرب الناس لقلبي وديماً بيشجعني وواقف جنبي .
هل فكرتي في وقت ما انك تسيبي شغلك بسبب الضغوطات والصعوبات التي كانت تواجهك ؟
انا كل يوم بفكر ان انا اسيب الشغل بسبب ان الضغط العصبي والنفسي بتاع الشغلانه كبير جداً واكتر حاجه متعبه بالنسبالي انه رغم اني بقالي ١٠ سنين في الشغلانه ولسه خايفه الناس تشوفني مش شاطره لإن احنا معندناش رفاهية ان احنا نرتاح لازم يبقا في ديماً ضغط عليكي علشان تثبتي للناس انك شاطره وناجحه بس انا بيجي عليا اوقات ببقا مش عايزه اثبت لحد حاجه ببقا عايزه ارتاح واريح صحتي وبس.
هل كان الزواج والحمل ومسؤولية البيت عائق بالنسبه ليكي ف مشوارك ؟
مسؤولية البيت والجواز حاجه كبيره جداً جداً بس الحمدلله انا معايا جوزي بيساعدني جداً ومبيحاولش يضغط عليا في حاجه ومؤمن بيا وبنجاحي وديماً بيقولي كلام يشجعني لما اتعب زي انتي شاطره وكملي هتوصلي ، ومع الحمل كنت بواجهه صعوبه اكتر لأني كنت تعبانه جداً بس كنت باجي علي نفسي وبشتغل وفضلت شغاله لحد اول اسبوع في الشهر التاسع وبعد الولادة تعبت جداً فا ريحت الفتره دي شويه من الحركه الكتير وكتابة الاخبار لكن بشتغل PR زي مانا من البيت او ممكن انزل مره او اتنين والموضوع بيبقا صعب في وجود طفل ولكن بحاول اخلص شغلي ومكالماتي في الوقت اللي بيكون نايم فيه علشان ماختفيش من الوسط الفني.
ما هي النجاحات التي حققتيها الي الان ؟
انا حققت نجاح كبير جداً ، اتكرمت كا افضل صحفية فن كذا مره ، وحققت نجاحات وانفرادات كمراسله وحالياً عندي نجاحاتي كا PR manager و كا صانعة محتوي علي السوشيال ميديا لأني بدأت مؤخراً في سكة ان الناس بتحبني طيب ليه ماكونش من الموثرين علي السوشيال ميديا واعمل فيديوهات للبنات تساعدهم علي النجاح وسط الصعوبات اللي بنواجهها في حياتنا لأن بقا في مشكلة عدم الثقه بالنفس وان معظم البنات بقوا مستلمين فا انا بعمل فيديوهات تشجعهم.
ما هي خططك للفتره القادمه ؟
خططي الفتره اللي جايه ان انا عايزه اكبر شركتي بتاعة التنظيم واشتغل مع فنانين اكتر واكون مسؤولة عن احتفالات اكتر وحفلات مع مغنين ، ونفسي ابقا رئيسة تحرير مش مراسله .
ما هو الحلم الذي تسعي الي تحقيقه يارا احمد ؟
الحلم اللي بسعي علشانه هو ان انا ادخل نقابة الصحفيين ، ده اكبر حلم عندي دلوقتي .
وفي نهاية الحوار بشكرك علي وجودك معانا ، وبطلب منك توجهي رساله لكل شخص عنده حلم وبيسعي لتحقيقه ؟
بقول لكل شخص عنده حلم ماتستلمش لأن النجاح صعب مش سهل بس ربنا بيكرم كل مجتهد وفعلاً لكل مجتهداً نصيب ومهما حصل ومهما عدت السنين ربنا هيكرمك علي قد تعبك وشغفك.