اجري الحوار : مي جمعه
السيره الذاتيه :
الأسم : بيلا أحمد
السن : 15
محل الاقامه: اسكندريه
بيلا أحمد اول بنت مصريه تعمل علي تجربه وصفات اكلات الأجانب بالوصفات المصريه .
1/ بدأتي تجربي وصفات الاكل امتي و ايه هي أول اكله عملتيها ؟!
من 6 ابتدائي بس ساعتها مجربتش اكل اجانب انا جربت حلويات مصريه وكانت أول حاجه "كيكه" و الغريب انها طلعت حلوه رغم أن كنت في 6 ابتدائي
2/ ازاي خدتي خطوه الظهور علي السوشيال ميديا ؟
الفكره جاتلي لما كنت بشوف اجانب بيعملو اكل وانا كنت حابه اجرب قولت اجرب في فيديوهات مع الناس مكنتش اتوقع إن انا هجيب المشاهدات دي او إن الناس تعملي فولو أو هعجب الناس عشان كدا استغربت و اتوترت كمان لما لاقيت الناس عايزيني و عايزين أعمل فيديوهات تانيه و حبوني و قولت ليه لأ بس هو ظهوري جه صدفه .
3/ظهورك علي السوشيال ميديا مع وصفات الاكل كانت موهبه و حد شجعك عليها ولا حد كان ليه الدور في الظهور ؟
اه خت رأي بابا و ماما و شجعوني و وافقوني علي القرار و كمان اختي كان ليها دور لان لما شوفت الاكلات دي قولتلها ليه معملش كدا و أعمل فيديوهات زي دي و الفكره أن محدش عمل كدا في مصر ، ليه مطلعش اعمل فيديو كدا و ردت قالتلي ماشي اعملي و بعد فتره شيلت الفكره من دماغي لان مبحبش اعمل مونتاج كتير و بعد الوقت دا بشهر قولتلها نفس السؤال بس مسكت في الكلمه لان ساعتها مكنتش بعمل اي حاجه و كانت فتره كورونا و طلعت الموهبه دي .
4/ ليكي طبع متميزه بيه ولا بتحبي تغيري في اي حاجه و تجربي ؟
لا مليش طبع معين لان بعمل الوصفات زي ما تيجي تيجي حتي لو باظت بعمل الفيديو لان لازم أوري الناس زي ما في حاجات بتفشل في حاجات بتنجح و مش كله علي طول ناجح ، قليل اوي لما بنجح في حاجه بس بطلع علي طبيعتي .
و كذا مره جربت اعمل موتشي و التجربه منجحتش
5/ لكل إنسان طموحات بيسعي عشان يحققها ايه هي طموحاتك ؟
انا مكنتش مخططه أن كل دا يحصل بس انا طموحي اطلع مع مني الشاذلي و اكون مضيفه طيران .
6/ ايه هي مشاريعك المستقبليه ؟
مركزه الفتره دي إن انا اكون مضيفه طيران جنب هوايتي في الاكل .