كتب- ياسمين إبراهيم
جوه كل بيت طفل موهوب في الرسم في العزف في الكتابة في النحت في الرياضة.
وفي دراسات كتير أثبتت أن الأم هي أول من يكتشف أن لديها طفل موهوب.
كل أسرة تتمنى أن يكون ابنها موهوب وناجح ومتميز.
و الموهبة هي التمتع بذكاء عالي والقدرة على إظهار امتيازات في أي مجال له قيمة.
طب ازاي اعرف أن ابني موهوب؟
أوقات كتير بتظهر موهبة الطفل هو بيرسم وهو بيلعب وهو بيغني وهو بيكتب بتكون علامات الموهبة واضحة على الطفل.
وفي أطفال كتير مش بتظهر عليهم الموهبه والأم بتعرف عن طريق الصدفة ممكن وهو بيلعب وهو بيكتب موضوع تعبير وهو بيرسم لوحة لفصله.
طب ازاي اتعامل مع طفل موهوب؟
الصراحة مفيش أحلى من فرحة أسرة لما بتعرف أن عندها طفل موهوب وفي أسر كتير بتعرف تتعامل مع الطفل الموهوب وفي أسر بتعامل مع الموهبة على إنها شيء عادي وفي أسر بتسخر من موهبة أطفالهم.
الحقيقة أن وجود الأطفال وصوتهم نعمة كبيرة من عند ربنا الصح بقى أن أي أسرة أول ما تعرف أن ابنها موهوب تركز في دعم ابنها نفسيا وماديا تركز في اكتشاف قدرات الطفل تركز في خروج موهبة الطفل للنور عارفين إظهار موهبة ابنك ليها دور كبير في تعزيز ثقته بنفسه وتكوين شخصية سوية وعلشان ده يحصل لازم يكون في برامج توعيه للأمهات والمعلمات والأباء .
و يكون في ندوات عن توجيه موهبة الطفل بصورة صحيحة.
ندوات عنوانها :
ازاي اعرف أن ابني موهوب؟
ازاي اتعامل مع موهبة ابني؟
ازاي اتعامل مع أي إحباط يحصل للطفل لو فشل في تحقيق هدفه؟
لابد من عمل حلقات مناقشة بين الأطفال الموهوبين وعلماء علم النفس وعلماء التربية علشان الطفل يعرف معنى الإصرار والتحدي وعدم التخلي عن أحلامه مهما كانت الضغوط.
عارفين التفوق والنجاح مش بس تحصيل دراسي
ادعم ابنك نفسيا وماديا.
خليك فخور بموهبة ابنك.
ابني ابنك.
شجع موهبة ابنك.
اوعي تقتل أو تسخر من موهبة الطفل.
خليك عارف ومتاكد مادام عندي طفل موهوب في البيت يبقى عندي كنز.
أطفالكم أمانة.
أطفالكم سر سعادتكم وتنمية مهاراتهم ومواهبهم واجب عليكم.