آية عبدالرؤوف تصرح في حوارها لـ"النيل اليوم"بجهز لأغنية جديدة اسمها "ميل عليا القمر" هتنزل خلال كام يوم
أجرى الحوار _ آلاء خاطر
صوت عذب جذب الجماهير لهدوء نغمه و صفاء ألحانه ،حواري مع الفنانة صاحبة الصوت الراقي آية عبدالرؤوف
-ممكن نتعرف على الفنانة الجميلة آية عن قرب و كمان احنا كجيل جديد حابين نتعرف على بدايتك الفنية؟
أنا آية عبد الرؤوف حبيت الغنا من وأنا طفلة عندي 8 سنين كنت ابتديت اتدرب في قصور الثقافة وبعد كدا في الأوبرا مع سليم سحاب ومن بعديها ابتديت في التمثيل عملت أكتر من عمل مسرحي في مسرح البالون والهناجر ومن بعدها اتجهت للمسلسلات وكان أكتر من عمل أشهرهم "أماكن في القلب" ،و"شرخ في جدار العمر" ، ومن بعدها رجعت اهتم بموهبتي الأساسية الغنا وقررت أقدم في برنامج المواهب ستار أكاديمي وكان أكبر ظهور ليا في الوطن العربي وعن طريقه أخدت شهره كبيرك في وقت قصير....
-مين أول من اكتشف الفنانة آية؟
اللي اكتشف موهبتي كان بابا وشجعني جدًا وحب صوتي وحبي للغنا وكان بيفضل يخليني اسمع أم كلثوم ووردة من وأنا صغيرة عشان يعلمني الطرب وأصول الغنا....
-مين أكتر أصوات الغناء العربي أقرب إلى قلبك و نفسك تبقي زيه؟
أقرب صوت ليا فيروز ،سميرة سعيد ،شيرين ،وردة وأتمنى في يوم أوصل لنجاحهم وأقدر أسيب بصمة ليا....
-هل الفنانة آية بتسمع للون المهرجانات؟
أنا مش بحب المهرجانات ومش بحب أسمعها بس هي لون ناجح مع الناس وأنا عمومًا بشوف إن كل شخص حر في حبه لشكل المزيكا اللي بيحبها....
-لو جتلك فرصة عشان تغني مع حد مهرجان تختاري مين؟
لو جتلي فرصه أغني مهرجان مش هوافق أكيد بس ممكن أغني مع ويجز هو عامل شكل مختلف من المزيكا....
-هل في أعمال غنائية جديدة؟
أعمالي الفترة اللي جايه انتهيت من تصوير فيديو كليب إنتاج شركة لايف ستايل ستوديوز إخراج المخرجة اللبنانيه رودينا حاطوم ،والأغنية كلمات أحمد حسن راؤول ،ولحن أحمد زعيم ،توزيع وسام عبد المنعم ،وهي أغنيه مختلفة وجديدة عليا جدا وكمان إطار الكليب جديد وأتمنى يحبه الناس زي ما حبيته
وأغنية سينجل هتنزل في خلال كام يوم اسمها "ميل عليا القمر "لحن وكلمات هاني رجب توزيع محمد هارون....
-كلمة أخيرة لجمهورك؟
أتمنى إني أكون بقدر أقدم أغاني يحبها جمهوري وأتمنى دايما إن يكونوا معايا وسبب لنجاحي الأكبر واللي بحلم بيه أوصله...