أجرى الحوار _ آلاء خاطر
حوار اليوم مع النجم الصاعد و البدر المتألق الفنان و السينارست المعروف محمود حمدان
-وراء كل عظيم إمرأة!! من هي المرأة اللي كانت وراء العظيم محمود حمدان؟
زوجتي إحنا متزوجين بقالنا سبع سنين و الحقيقة بعد الجواز بدأت أشوف النجاحات ،وهي دايمًا واقفة فضهري.
-ممكن تذكر لنا موقف؟
موقف واحد لا والله أبقى بظلمها؛ لإن هي مواقف كتيرة جدًا جدًا جدًا و لكن أهمهم في البداية استحملتني كتير لحد الحمد لله ما ربنا كرم بعد كده يعني.
-ممكن نعرف برجك الفلكي ايه، و هل تؤمن بالابراج؟
برجي: الحوت، مؤمن بالأبراج مش قوي يعني بس بحس فيها بفكرة بس يعني هادي، عصبي شوية اه الحاجات دي بس إنما مش كل التفاصيل يعني.
-عشان يكون انفراد صحفي للجريدة هل في أعمال جديدة لحضرتك؟
آخر أعمالي عندي فيلم ليلة الهالوين ده إنتاج احمد السبكي لسه مخترناش Cast (فريق العمل) بس لسه شغالين عليه.
-ممكن تذكر لنا بعض الأشياء اللي بتسعد محمود حمدان؟
الأشياء اللي بتسعدني إني أشوف كل أهلي بخير و صحابي كويسين و بضايق جدًا لما حد من صحابي بيحصله حاجة أو يبقى مضايق و أنا مش عارف أحلله مشكلته أو حتى حد من أهلي يعني دي حاجة بضايقني جدًا و ببقى مبسوط طول ما هما مبسوطين يعني.
-مين هم أشهر كتاب السيناريو اللي تأثرت بيهم و ايه هو أكتر سيناريو حبيته؟
أشهر الكتاب اللي اتأثرت بيهم طبعا الاستاذ وحيد حامد بحب فيه إنه بيخوض في بعض الأشياء بشكل غير مباشر و أنا ضد المباشرة و لكن بحب يعني ألمس وجع الناس و ابقى حاسس بيهم في الأعمال يعني بدون ما أدخل في مباشرة يعني.
غير أستاذ وحيد مثلًا أسامة أنور عكاشة و الأستاذ أسامة أنور عكاشة كاتب مهم حقيقي و كان بيعرف يورينا الشخصيات المصرية الحقيقة بمشاكلها بهمومها فكنت بحبه جدًا.
-ما مدى علاقتك بالزعيم عادل إمام؟
علاقتي بالأستاذ عادل إمام الحمد لله كويسة جدًا و هو بيحبني و دايمًا لما كنت بحكيله مواقف في مشاهد معينة كان بيضحك و مبسوط و يتناقش معايا و بيحب يسمعلي الحمد لله.
-مين هم النجوم اللي مشتركتش معاهم في أعمال فنية و تتمنى العمل معاهم؟
يعني نفسي أكتب للأستاذ يحيى الفخراني، أحمد السقا، كريم عبد العزيز
يعني في نجوم كتير يعني و ربنا يكرم و يكون في تعاون بيني و بينهم.
كلمة اخيرة لجمهورك؟
الكلمة الأخيرة نفسي الناس كلها تبقى في صحة و سعادة و ستر و محدش يحصله أي سوء و بحب الحقيقي اسمع ان الناس تتكلم عن بعض أعمالي بشكل كويس لما يقابلني و ابقى مبسوط و ده بيحملني أن أقدم فن كويس، فن الناس تحترمه و تحبه.