كتب_نهى شاهين
يعتبر الرسم فن تشكيلي يتم فيه التعبير عن الأحاسيس والأفكار بوساطة الاشكال والألوان وهو فن عرف منذ القدم ويعتبر الفن رسالة سامية للفنان ليعبر عن مشاعره وافكاره من خلال الرسمة فالرسم
يساعد على الهدوء وتقليل التوتر والعصبية والابتعاد عن الناس واليوم معانا الفنانة الرسامة نورا عبدالفتاح اهلا بيكى فى جريدة النيل اليوم
فى بداية اللقاء نرجو أن نقدم نبذة مختصرة عن حياتك؟
أنا نورا عبدالفتاح ٢٣ سنة عايشة فى مسجد وصيف مركز زفتى الغربية متخرجة من كلية تربية نوعية قسم فنية سنة 2019م وبعشق الرسم
هل كانت رغبتك منذ البداية ان تدخل كلية تربية نوعية؟
انا كان نفسي ادخل آداب قسم تاريخ او علم نفس بس فى نفس الوقت كنت بحب الرسم جدا وكان فى مدرس عارف أني بحب الرسم وهو إلا قدام لي فى تربية نوعية قسم فنية ولم دخلت الكلية حبيت المجال جدا وكان عندى الكثير من المواد فى قسم فنية منهم التاريخ بدرس تاريخ الفنانين ومادة علم نفس طول الاربع سنوات
ما هى الصعوبات التي وجهتك أثناء بداية مشوارك الفني؟
فى البداية كنت حاسة أن فى حاجات تانية غير الرسم فى قسم فنية مثل النحت والخزف والنسيج والتصميمات وكان بالنسبة ليا حاجة جديده ومش عارفة ازاى استخدامها فكنت عايزة انقل كلية تانية واعتبر أن الرسم مجرد موهبة فقط وامارسها لوحدى بس بعدها فكرت أن أجرب سنة فى الكلية واحاول واتعلم لو لقيتها صعبة احول كلية أخرى بس بالعكس كملت واتعلمت وعرفت اشتغل بالخزف واصمم واعمل نسيج
هل الرسم موهبة عندك من صغرك؟
أيوة لدرجة أني كنت وأنا صغيرة كنت برسم فى الكتاب وفى يوم رسمت على الحيطه كلها فى المدرسة وكنت أيام المدرسة لما المدرس يتأخر عن الحصة كنت بقطع ورقة من الكراسة وارسم فيها وأكتر حاجة فرحانة بيها أن لسه مكمله رسم من وأنا صغيرة لحد ما كبرت وأتخرجت من كلية تربية فنية
ما هى أهم الصفات التي يجب أن تتوافر فى الرسام؟
الهدوء ويكون عنده موهبة وبيحب الرسم وينظر فى كل الأشياء ويتخيلها
ما هى الكورسات والمهارات التى حصلت عليها؟
حصلت على كورس ICDL وكورس بالالوان والرصاص
هل أحببت الرسم فعلا أم فقط مجرد موهبة لقضاء وقت الفراغ؟
ممكن تقدرى تقولى أنا والرسم حاجة واحده كاني أنا وهو أصحاب لما بكون مدايقة برسم وبرتاح أوى كاني بشتكي للرسم بتحسي بهدوء وبتحسي أن أنتى بعيدة عن الناس والدنيا وموجودة فى عالم تانى
هل يعد الرسم تحررا للرسام أم سجن داخل لوحة؟
عمره ما كان سجن طبعا تحررا عشان أنا بشعر بهدوء وأنا برسم وبكون بعيدة عن كل الناس وعمره ما كان سجن لي والدليل الفنان بيرسم الطبيعة وبيجسمها ازاى يكون سجن
متى رسمتي أول لوحه؟ولمين؟
أول مرة أرسم وأنا صغيرة كانت أشكال موجودة على كراسه الدرس كنت بحب أرسمها ولما دخلت الكلية رسمت طبيعة صامته وكانت الدكتورة الا طلبت نرسمها كبداية تعرف مواهبة كل واحد فينا
ما هى أحب اللوحات إلى قلبك؟
أحلى رسمة بالنسبة لي كانت لخالي الله يرحمه وحبيتها جدا لدرجة أني رسمت صورته مرتين
من هم الأشخاص الذين كانوا لهم تأثير على اتجاهك للرسم؟
ماما أول واحده كانت دائما بتشجعني فى الرسم وواقفة معايا وأنا برسم وباخد رأيها فى كل رسمة برسمها ربنا يبارك فيها
ما هى طموحاتك بشأن الرسم فى المستقبل؟
نفسي أتعلم كل حاجة عن الرسم طول ما أنا عايشة عايزة أعرف كل حاجة وأحسن كل مرة فى رسمى نفسى كمان ابقا رسامة مشهورة وشاطرة جدا
ما هو رأيك بالواقع الفني اليوم؟
جميل جدا وفى مواهب كتير بتحب الرسم وفى أطفال بيتعلموا الرسم لحبهم فيه والرسم دا أحلى حاجة فى الدنيا
لوحة رسمتيها ولها تأثير كبير فى حياتك؟
كل لوحة ليها تاثير كبير فى حياتي بحاول اخد منها أى غلطة وأعدلها فى اللواحات التانية ودى أكتر حاجة بحبها
ما هى أشهر لوحاتك؟
لوحة لراجل كبير فى السن بحبها جدا لأنها تعتبر أصعب اللوحات لان فى تفاصيل كتير من تجاعيد فى الوش
ما هو أكثر رسام مشهور إثر فيكى بلوحاته؟
الرسام لفان جوخ
أى هى أكتر اللوحات التى تحبيها لرسام مشهور ؟
أحب اللوحات الرومانسية جدا
هل من كلمة أخيره ؟
أقول إلا عنده موهبة الرسم ينميها والرسم دا حاجة جميلة جدا كفاية الهدوء والبعد عن التوتر والقلق وربنا يعدي الفترة دى على خير ويحفظنا من كل شر وحفظ الله الجميع
شكرا لحضرتك الرسام نورا على هذا الحوار الجميل