كتب_مصطفى عصام
أول ما تخلص رحلتك في مسجد الرفاعي،وأنت رايح لحي القلعة، هناك هتلاقي مسجد محمد علي في مكان عالي،كل ده تمام ، بس تعرف أن المكان اللي على قمته مسجد محمد علي هو قلعة صلاح الدين الأيوبي، طبعا هتستغرب إزاي مسجد يتبني فوق قلعة وكمان على ربوة منفصلة من جبل المقطم ،تعالوا نعرف قصة المكانين اللي بالرغم من اختلاف زمان بنائهم والشخصيتين اللي بنوا المكانين دول،إلا أنك أول ما تشوفهم هتلاقي في ترابط واندماج بينهم
نبدأ بقلعة صلاح الدين الأيوبي وليها اسم تاني (قلعة الجبل):
صلاح الدين الأيوبي أمر الأمير بهاء الدين قراقوش الاسدي ببناء قلعة الجبل فوق جبل المقطم في مكان بيشرف على القاهرة (في الجهة البحرية) ومدينة نصر والقرافة (في الجهة القبلية الغربية) والنيل(في جهة الغرب)
وجبل المقطم وراها(في الجهة الشرقية) ، المكان اللي اتبنى عليه القلعة كان معروف بأسم ((قبة الهوا)) ، وفيه شوية مقابر و جوامع، وكان تحتيه ميدان اسمه ميدان أحمد بن طولون .
وسبب بناء القلعة أنه بعد ما صلاح الدين قضي علي الدولة الفاطمية قعد في دار الوزارة في القاهرة، بس كان خايف من شيعة الخلفاء الفاطميين في مصر، وفكر يعمل حصن حصين لنفسه، من حيث أنهم ما يقدروش يوصلوله فيه، وشاف انه جبل المقطم مكان أمن لبناء القلعة ، فأبتدي البنا بسور يحوط بيه القاهرة والقلعة ، ولكن صلاح الدين اتوفي قبل ما البناء يخلص
فجاه الملك الكامل وكمل البناء
وبينا نعرف أبواب وأبراج وقصور ومساجد ومتاحف القلعة
أبواب القلعة عددها 5 أبواب:
باب المقطم،الباب الجديد، الباب الوسطاني،باب القلعة، باب العزب
وأبراج القلعة عددهم 13 برج:
برج المقطم،برج الخليفة، برج العلوة ،برج كر كيلان،برج الطرفة ،برج المطار،برج المبلط ،برج المقوصر، برج الامام ،برج الرملة، برج الحداد ،برج الصحراء ،البرج المربع .
وقصور القلعة عددهم 4 قصور:
قصر الجوهرة ،قصر الحرم ،قصر الأبلق ،سراي العدل.
ومساجد القلعة عددها 4 مساجد:
مسجد محمد علي، مسجد ومدرسة الناصر احمد بن قلاوون،مسجد سليمان باشا الخادم-سارية الجبل، مسجد احمد كتخدا عزبان-جامع العزب .
ومتاحف القلعة 2 متحف:
متحف الشرطة والمتحف الحربي .
خلصنا كلامنا عن القلعة نروح لمسجد محمد علي:
بعد ما تولي محمد علي حكم مصر اعتني بالقلعة وصلح اسوارها ، وعمل جوه القلعة قصور الحريم وسراي الجوهرة
ولما خلص أصلاحاته في القلعة .
شاف أنه يتبني مسجد عشان يودي فيه هو وموظفيه الفرائض الدينية، وعشان يعمل فيه مدفن يكون مثواه الأخير، فبني المسجد في جزء من أرض قصر الابلق اللي بناه الناصر محمد بن قلاوون وأبتدي البناء في سنة 1830 وأنتهي البناء 1848 م
ومصمم المسجد المهندس المعماري الفرنسي باسكال كوست ، لو هتروحوا مسجد محمد علي ما تنسوش تقروا الفاتحة علي روح مؤسس مصر الحديثة .
